នាជំនួបប្រជុំនៅទីស្តីការក្រសួង គណៈប្រតិភូបានបង្ហាញអំពីថ្នាលបច្ចេកវិទ្យា ដែលត្រូវបានរៀបចំឡើងដើម្បីទាក់ទាញអ្នកវិនិយោគ ដោយរួមបញ្ចូលទិន្នន័យតំបន់សេដ្ឋកិច្ចពិសេស និងសួនឧស្សាហកម្មនៅកម្ពុជា។ ថ្នាលបច្ចេកវិទ្យានេះ បំពាក់ដោយបច្ចេកវិទ្យាបញ្ញាសប្បនិម្មិតពហុភាសា, មានមុខងារអន្តរកម្ម ដូចជាផែនទីនិម្មិត និងផ្តល់ព័ត៌មានសំខាន់ៗអំពីឱកាសវិនិយោគ ក្របខណ្ឌច្បាប់ និងព័ត៌មានឧស្សាហកម្ម។
ចំពោះ ឯកឧត្តម ហែម វណ្ណឌី បានវាយតម្លៃខ្ពស់ចំពោះគំនិតផ្តួចផ្តើមនេះ និងបានលើកឡើងពីសក្តានុពលនៃថ្នាលបច្ចេកវិទ្យាក្នុងការគាំទ្រកំណើនសេដ្ឋកិច្ច និងតម្រូវការគ្រប់គ្រងទិន្នន័យរបស់កម្ពុជា។ ឯកឧត្តមរដ្ឋមន្ត្រី បានចាត់តាំងឱ្យក្រុមការងារជំនាញ វាយតម្លៃថ្នាលបច្ចេកវិទ្យានេះ ដែលអាចជាការបំពេញបន្ថែម ឬប្រទាក់ក្រឡាជាមួយប្រព័ន្ធគ្រប់គ្រងគម្រោងវិនិយោគ របស់ក្រុមប្រឹក្សាអភិវឌ្ឍន៍កម្ពុជា (cdcIPM)។
ឯកឧត្តមរដ្ឋមន្ត្រីឧស្សាហកម្ម បានបញ្ជាក់ការប្តេជ្ញាចិត្តរបស់រាជរដ្ឋាភិបាល ក្នុងការជំរុញបរិយាកាសវិនិយោគអំណោយផល ការប្រើប្រាស់នវានុវត្តន៍បច្ចេកវិទ្យា និងការពង្រឹងទំនាក់ទំនងជាមួយប្រទេសចិន។ ឯកឧត្តមក៏បានស្នើឱ្យសមាគមខិតខំទាក់ទាញការវិនិយោគក្រៅប្រទេស ពីប្រទេសចិនមកកម្ពុជា ដោយលើកឡើងពីសក្តានុពលរបស់កម្ពុជា ជាទិសដៅឧស្សាហកម្មដ៏ប្រសើរ៕
