លោក ប៊ូ ច័ន្ទភីរូ អគ្គនាយកនិយ័តករធានារ៉ាប់រងកម្ពុជាបានលើកឡើងថា នៅក្នុងវិស័យហិរញ្ញវត្ថុ និស្សិតដែលបញ្ចប់ការសិក្សាថ្នាក់បរិញ្ញាបត្រភាគច្រើន មានចំណេះដឹងទូទៅផ្នែកហិរញ្ញវត្ថុ និងធនាគារ ប៉ុន្តែពុំទាន់មានចំណេះដឹងស៊ីជម្រៅលើផ្នែកធានារ៉ាប់រងនោះទេ។
លោកលើកទឹកចិត្តលើកទឹកចិត្តដល់យុវជនខ្មែរ ពង្រឹងសមត្ថភាពអាចឡើងកាន់តំណែងជាថ្នាក់ដឹកនាំជាន់ខ្ពស់ និងអគ្គនាយក (CEO) នៅក្នុងក្រុមហ៊ុនធានារ៉ាប់រងអន្តរជាតិធំៗនៅកម្ពុជា ខណៈឱកាសអាចក្លាយជាអ្នកដឹកនាំ នៅតែជាអាទិភាពបើសិនធនធានមនុស្សក្នុងស្រុកមានសមត្ថភាពគ្រប់គ្រាន់។
លោក ប៊ូ ច័ន្ទភីរូ បានបញ្ជាក់ថា «គោលដៅទៅថ្ងៃអនាគត គឺយើងចង់ឱ្យអ្នកដឹកនាំកំពូលៗ និង CEOs នៃក្រុមហ៊ុនធានារ៉ាប់រងជាជនជាតិខ្មែរ»។
ក្រុមហ៊ុនបរទេសក៏ចង់បានជនជាតិក្នុងស្រុកដែលមានសមត្ថភាព និងយល់ច្បាស់ពីវប្បធម៌ និងបរិបទក្នុងស្រុកដែរ ព្រោះការជួលជនបរទេសត្រូវចំណាយខ្ពស់ណាស់ ខណៈ ការប្រើប្រាស់អ្នកក្នុងស្រុកផ្តល់ផលប្រយោជន៍ច្រើនទាំងការយល់ដឹងពីចំណង់ចំណូលចិត្តអតិថិជន និងការចំណេញរបស់ក្រុមហ៊ុន។
ដោយសារកង្វះខាតធនធានមនុស្សដែលមានជំនាញ ក្រុមហ៊ុនធានារ៉ាប់រងនានាតែងតែធ្វើការទាក់ទាញ ឬលួចបុគ្គលិកដែលមានបទពិសោធន៍ពីគ្នាទៅវិញទៅមក ដែលបង្កើតជាបញ្ហាប្រឈមក្នុងទីផ្សារការងារ។
ពាក់ព័ន្ធជំរុញយុវជនខ្មែរអាចក្លាយជាអ្នកគ្រប់គ្រងនូវស្ថាប័នធំៗ លោក ផុន ណារិន សកលវិទ្យាធិការនៃសាកលវិទ្យាល័យពាណិជ្ជសាស្រ្ត អេស៊ីលីដា យល់ឃើញថា «ខ្ញុំគិតថា យើងអាចធ្វើបាន!»។
លោកលើកឡើងថា «បរទេសក៏ដោយ ខ្មែរយើងក៏ដោយ គឺវិនិយោគិនគេគិតពីលទ្ធភាពនៃការអភិវឌ្ឍ និងរីកចម្រើនទៅមុខ។ អីចឹងការអភិវឌ្ឍរីកចម្រើន វាត្រូវការការចំណាយមួយដែលមានប្រសិទ្ធភាព»។
លោកថា «បើសិនជាអាចប្រើថ្នាក់គ្រប់គ្រងនៅក្នុងស្រុក ថ្លៃចំណាយធនធានក្នុងស្រុកមិនសូវខ្ពស់ទេ។ ប៉ុន្តែនៅពេលដែលនាំបរទេសមក ត្រូវចំណាយសព្វគ្រប់ មានទាំងថ្លៃស្នាក់នៅអ្នកយាមផ្ទះ ត្រូវមានរបបផ្សេងៗនិងណាមួយត្រូវចាយលើថ្លៃកូនរៀន ដើម្បីមកនៅជុំគ្នា ដែលនេះជាចំណាយមួយខ្ពស់។
បើតាមបទពិសោធន៍របស់លោក ដែលធ្លាប់ទៅគ្រប់គ្រងដឹកនាំនៅប្រទេសឡាវផង លោកប្រៀបធៀបការចំណាយរវាងការជួលបរទេស និងក្នុងស្រុកបើធៀបគ្នាខុសគ្នាពី ៣ ដង ទៅ ៥ ហើយបើក្នុងស្រុកមានសមត្ថភាពដូចគ្នា ការជ្រើសរើសធនធានក្នុងស្រុកជាជម្រើសល្អប្រសើរបំផុត»។
បច្ចុប្បន្ន ក្រុមហ៊ុនធានារ៉ាប់រងនៅកម្ពុជាមានប្រមាណ ៣៩ ទៅ ៤០ ក្រុមហ៊ុន ខណៈបើតាមមន្រ្តីនិយ័តករធានារ៉ាប់រងអះអាងថា ក៏មានថ្នាក់ដឹកនាំជាធនធានក្នុងស្រុកមួយចំនួន កំពុងកាន់តំណែងដឹកនាំនៅក្រុមហ៊ុនបរទេសធំៗ ដែលកំពុងធ្វើអាជីវកម្មក្នុងប្រទេសកម្ពុជា។
និយតករធានារ៉ាប់រងកម្ពុជា (ន.ធ.ក.) និង សកលវិទ្យាល័យពាណិជ្ជសាស្ត្រ អេស៊ីលីដា បានចុះអនុសារណៈនៃការយោគយល់គ្នា (MoU) ក្នុងគោលបំណងពង្រឹងកិច្ចសហប្រតិបត្តិការ អភិវឌ្ឍធនធានមនុស្ស និងពង្រឹងសមត្ថភាពជំនាញក្នុងវិស័យធានារ៉ាប់រងនៅកម្ពុជា។
តាមរយៈការចុះ MoU ជាមួយសកលវិទ្យាល័យ អេស៊ីលីដា នឹងបង្កើតវគ្គសិក្សា ដែលនឹងបញ្ចូលមុខវិជ្ជា ឬកម្មវិធីសិក្សាផ្នែកធានារ៉ាប់រងកម្រិតមូលដ្ឋាន និងជំនាញ ទៅក្នុងកម្រិតឧត្តមសិក្សានៅតាមសកលវិទ្យាល័យ។
លោក ប៊ូ ច័ន្ទភីរូ បានអះអាងថា រួមទាំងសកលវិទ្យាល័យ អេស៊ីលីដា គឺជាសកលវិទ្យាល័យទី ៥ ដែលបានចុះ MoU ជាមួយ ដើម្បីសហការគ្នាបណ្តុះបណ្តាលជំនាញធានារ៉ាប់រង ដើម្បីឱ្យនិស្សិតអាចចាប់យកឱកាសការងារដែលកំពុងរីកចម្រើនយ៉ាងខ្លាំង និងអាចក្លាយជាអ្នកដឹកនាំទៅថ្ងៃអនាគត៕
